پاک فوج کی جانب سے سوات، دیر اور چترال میں شدید بارشوں سے متاثرہ علاقوں میں ریسکیو آپریشن جاری ہے۔
چترال کے علاقہ دروش، سوات کے علاقوں بحرین، مدین، مٹہ اور دیر میں شدید بارشوں کی وجہ سے کئی رابطہ سڑکیں زیرآب آنے کے بعد پاک فوج کی جانب سے ہنگامی بنیادوں پر ریسکیو آپریشن کیا جا رہاہے۔
ضلعی انتظامیہ اور دیگر ریسکیو اداروں کے ساتھ مل کر ریسکیو آپریشن کے ساتھ ساتھ پاک فوج نےکئی رابطہ سڑکوں کو بھی بحال کیا۔
چترال سے پشاور مین روڈ لینڈ سلائیڈنگ کی وجہ سے بند ہونے پر پاک فوج کی جانب سے بھاری مشینوں کے ذریعے رکاوٹیں ہٹا کر ٹریفک بحال کردیا۔
پاک فوج کی جانب سےمسافروں اور سیاحوں کو بھی مددفراہم کی جارہی ہے تاکہ وہ بغیر رکاوٹ کے سفر جاری رکھ سکیں۔ پاک فوج شدید بارشوں کے دوران عوام کی خدمت کے لئے متحرک ہے
