قومی اسمبلی، ارشد ندیم کو خراج تحسین پیش کر نے کی قرارداد منظور

پیرس اولمپکس 2024 میں گولڈ میڈل جیت کر پاکستان کا نام روشن کرنےوالےایتھلیٹ ارشد ندیم کو خراج تحسین پیش کرنے کیلئے قومی اسمبلی میں قرارداد پیش کردی گئی۔قرارداد پیپلز پارٹی کی رکن سحر کامران نے پیش کی۔اس موقع پر انہوں نے کہا کہ ارشد ندیم کو اولمپکس میں کامیابی ریکارڈ بنانے اور 40سال بعد پاکستان کیلئےسونے کا تمغہ جیتنے پر مبارکباد پیش کرتے ہیں۔قومی اسمبلی میں پیش کی گئی قرارداد کے متن کے مطابق ارشد ندیم نے 92.97 میٹر جیولین تھرو پھینک کر پیرس اولمپکس میں ریکارڈ قائم کردیا ہے، ایوان ارشد ندیم کی مسلسل محنت اور کاوشوں کو خراجِ تحسین پیش کرتا ہے۔قرارداد کے متن میں کہا گیاہے کہ ایوان حکومت سے مطالبہ کرتا ہے کہ ارشد ندیم کی بھرپور عزت افزائی کرے۔ حکومت کھیلوں کے فروغ کے لیے اقدامات اُٹھائے تاکہ دنیا میں پاکستان کا نام روشن ہو۔