مولانا فضل الرحمان 26ویں آئینی ترمیم کے لیے راضی ہو گئے

جے یو آئی کے سربراہ مولانا فضل الرحمان 26 ویں آئینی ترمیم کی حمایت کیلئے راضی ہو گئے۔اس حوالے چئیرمین پیپلز پارٹی بلاول بھٹو نے امیر جے یو آئی کو 26 ویں آئینی ترمیم کا مشترکہ ڈرافٹ پیش کرنے پر راضی کر لیا، مولانا کی حمایت سے آئینی ترمیم قومی اسمبلی میں پیش کی جائے گی ۔ پیپلز پارٹی اور جے یو آئی نے حکومتی ترمیم کے بجائے اپنی مشترکہ آئینی ترمیم منظور کروانے کا فیصلہ کیا ہے۔دوسری جانب وفاقی مشیر سیاسی امور رانا ثنا ء اللہ نے کہاہے کہ مولانا فضل الرحمان کے ساتھ ہماری شروع دن سے بات چیت تھی اور ہم چاہتے تھے کہ وہ ہمارا ساتھ دیں، اب تک تو تاخیر ہوئی اور وقت دیا گیا وہ بھی مولانا فضل الرحمان کی تجویز پر دیا گیا تھا، مولانا نے کراچی میں بلاول بھٹو سے میٹنگ کی، پھر نوازشریف کے ساتھ میٹنگ کی، مولانا ہمارے ساتھ ایک مسودے پر متفق ہیں۔مولانا نے جس مسودے پر وعدہ دیا ہے وہ ساتھ کھڑے ہوں گے ، اس میں کوئی شک نہیں ہے۔