دیامر بھاشا ڈیم،مظاہرین کےجائز مطالبات کو پورا کیا جائے گا. انجینئر امیر مقام

وفاقی وزیر برائےامور کشمیر، گلگت بلتستان اور سیفران انجینئر امیر مقام کی زیر صدارت دیامر بھاشا ڈیم کے متاثرین کی شکایات کے حوالے سے اہم اجلاس ہوا۔اس دوران بات کرتے ہوئے انھوں نے کہا کہ گلگت بلتستان اور آزاد جموں و کشمیر کی ترقی وفاقی حکومت کی اولین ترجیح ہے وفاقی وزیر انجینئر امیر مقام نے کہا کہ مظاہرین کے جائز مطالبات کو پورا کیا جائے گا۔وفاقی کمیٹی گلگت بلتستان کے مسائل کا مستقل حل تلاش کرے گی۔اجلاس میں زمین کے معاوضے، پانی کی فراہمی، صفائی ستھرائی اور گھریلو آبادکاری پیکج  یعنی ولھا پیکج سے متعلق دیرینہ شکایات کو حل کرنے پر توجہ مرکوز کی گئی۔گلگت بلتستان حکومت نے تکنیکی مسائل کے حل کے لیے ایک کمیٹی تشکیل دی ہے۔وزیراعلیٰ گلگت بلتستان نےبذریعہ ویڈیو لنک اجلاس میں اظہار خیال کرتے ہوئے کہا کہ واپڈا کے سینئر حکام اور گلگت بلتستان کمیٹی دیامر بھاشا ڈیم کے لیے زمین کے حصول اور آباد کاری سے متعلق مسائل کے حل کے لیے مل کر کام کریں گےوفاقی کمیٹی نے معاملے کو خوش اسلوبی سے حل کرنے کے لیے کام جاری رکھنے کا فیصلہ کیا۔اعلیٰ سطحی اجلاس میں وفاقی وزیر برائے آبی وسائل ڈاکٹر مصدق حسین ملک، گلگت بلتستان کے وزیر اعلیٰ حاجی گلبر خان، واپڈا کے چیئرمین لیفٹیننٹ جنرل (ر) سجاد غنی، سیکرٹری امور کشمیر و سیفران ظفر حسن، گلگت بلتستان کے چیف سیکرٹری ابرار احمدمرزا، ایڈیشنل سیکرٹری کامران رحمان خان اور دیگر متعلقہ حکام نے شرکت کی۔