عالمی یوتھ چیمپئن عثمان وزیر تھائی لینڈ کے شہربنکاک میں 16 ویں پروفیشنل فائٹ میں بھارتی حریف کو بدترین شکست دے کر ناقابل شکست کامیابی حاصل کرنے کے بعد واپس وطن پہنچ گئے،کراچی ایئرپورٹ پر ان کا شان دار استقبال کیا گیا۔ اورکراچی ایئرپورٹ پاکستان زندہ باد کے نعروں سے گونج اٹھا جہاں رکن قومی اسمبلی اسد عالم نیازی، رکن سندھ اسمبلی آصف موسیٰ، چنیسر ٹاؤن کراچی کے چیئرمین فرحان غنی اور دیگر نے پھولوں کا ہار پہنا کر استقبال کیا۔اس دوران میڈیا سے گفتگو کرتے ہوئے انھوں نےکہا کہ بھارتی باکسر کو ہرا کر پاکستان واپس آیاہوں، بہت خوشی ہے کہ ایک بار پھر کامیابی ملی ہے، مداحوں اور چاہنے والوں کی بھرپور سپورٹ اور تعاون کی وجہ سے کامیابی سے ہمکنار ہوا۔انہوں نے کہا کہ پاکستان پیپلز پارٹی (پی پی پی) کی قیادت نے بھی کافی سپورٹ کیا اور اب میرا پرتپاک خیر مقدم کیا۔گلگت بلتستان سے تعلق رکھنے والے عثمان وزیر نے کہا کہ میں بھی پاکستانی ہوں اور میرا بھی حق ہے کہ میری حوصلہ افزائی کی جائے، وزیراعظم پاکستان سے درخواست ہے کہ میری بھی حوصلہ افزائی کریں، آرمی چیف ہمارے ملک کا فخر ہیں، ان سے بھی امید ہے کہ ضرور حوصلہ افزائی کریں گے۔انہوں نے کہا کہ میرا تعلق گلگت بلتستان سے ہے، میں بھی پاکستان کا بیٹا ہوں، میرے لیے میرا ملک پاکستان سب سے پہلے اور علاقہ بعد میں ہے، ملک کا نام روشن کرنے کے لیےکسی قربانی سے دریغ نہیں کروں گا۔
عثمان وزیر نے کہا کہ ہمارے ہاں ٹیلنٹ کی کوئی کمی نہیں ہے، لیاری میں ٹیلنٹ بہت ہے، ان تمام باکسرز کو حکومتی توجہ چاہیے تاکہ وہ بھی آگے بڑھ سکیں، اپنے چاہنے والوں کی بدولت بھارت کو شکست دے کر ملک کا نام روشن کیا ہے۔
