کراچی میں مختلف علاقوں میں پیش آنے والے افسوسناک ٹریفک حادثات میں آن لائن فوڈ ڈیلیوری رائیڈر سمیت کم از کم چار افراد جاں بحق اور متعدد زخمی ہو گئے۔ تین تلوار کے قریب ایک تیز رفتار کار نے موٹر سائیکل کو ٹکر مار دی، جس کے نتیجے میں ایک شخص جاں بحق اور دوسرا زخمی ہو گیا، پولیس نے کار سوار کو موقع سے گرفتار کر لیا۔ ڈیفنس کے علاقے خیابان نشاط میں ڈبل کیبن گاڑی نے موٹر سائیکل پر سوار آن لائن فوڈ ڈیلیوری رائیڈر مرتضیٰ کو کچل دیا، جو موقع پر ہی دم توڑ گیا۔ پولیس کے مطابق گاڑی کے ڈرائیور عثمان شاہ راشدی کو گرفتار کر لیا گیا ہے، جو سابق ڈی آئی جی پیر حسن شاہ راشدی کا پوتا ہے۔ شارع فیصل کے قریب کارساز پر ایک نامعلوم گاڑی کی ٹکر سے نوجوان شمعون جاں بحق جبکہ اس کی والدہ شدید زخمی ہو گئیں۔ ایک اور واقعے میں قیوم آباد کے قریب جام صادق پل پر ایک نامعلوم گاڑی نے موٹر سائیکل سوار کو روند ڈالا، جس کی شناخت تاحال نہیں ہو سکی۔ پولیس نے تمام واقعات کی تحقیقات شروع کر دی ہیں۔
کراچی کے مختلف علاقوں میں ٹریفک حادثات،4 افراد جاں بحق،متعدد زخمی
Date:
