بھارتی پولیس نے معروف یوٹیوبر جسبیر سنگھ کو پاکستان کے لیے جاسوسی اور مشتبہ روابط کے الزام میں گرفتار کر لیا ہے۔ بھارتی میڈیا کے مطابق، جسبیر سنگھ نے تین بار پاکستان کا دورہ کیا اور مبینہ طور پر پاکستان ہائی کمیشن کے اہلکار احسان الرحیم عرف دانش اور انٹیلیجنس آفیسر شاکر عرف جٹ رندھاوا سے رابطے میں رہا۔ پولیس کا دعویٰ ہے کہ جیوتی ملہوترا کی گرفتاری کے بعد جسبیر نے اپنے پاکستانی رابطوں کے شواہد مٹانے کی کوشش کی۔ تحقیقات میں انکشاف ہوا کہ وہ دہلی میں پاکستان کے قومی دن کی تقریب میں بھی شریک ہوا تھا، جہاں اس نے پاکستانی اہلکاروں اور وی لاگرز سے ملاقات کی۔ اس کے قبضے سے ملنے والے الیکٹرانک آلات میں پاکستانی نمبرز بھی پائے گئے ہیں۔ موہالی میں اس کے خلاف ایف آئی آر درج کر لی گئی ہے اور پولیس اس مبینہ جاسوسی نیٹ ورک کے مزید کرداروں کی تلاش میں ہے۔
