پنجاب حکومت نے صوبے بھر میں ویپنگ اور الیکٹرانک سگریٹس (ای سگریٹس) کی خرید و فروخت پر مکمل پابندی عائد کر دی ہے جس کی منظوری صوبائی کابینہ نے دی ہے، اور تمام ویپنگ سینٹرز کو فوری بند کرنے کا حکم جاری کیا گیا ہے۔ وزیراعلیٰ مریم نواز شریف نے لاہور میں کابینہ اجلاس کے دوران نوجوانوں میں ویپنگ کے بڑھتے ہوئے رجحان کو سنگین صحت کے خطرات قرار دیتے ہوئے ضلعی انتظامیہ کو ہدایت کی کہ وہ خاص طور پر لاہور میں غیر قانونی ویپنگ سینٹرز کے خلاف کریک ڈاؤن شروع کرے۔ ان کا کہنا تھا کہ بغیر نگرانی کے ای سگریٹس کا استعمال نوجوانوں میں نشہ آور عادتیں پیدا کر رہا ہے جو مستقبل میں مہلک بیماریوں کا باعث بن سکتا ہے، اس لیے یہ قدم نوجوانوں کی صحت اور معاشرتی بہتری کے لیے ضروری ہے۔
