سیاست میں عزت ہے نہ عوام کی خدمت,شاہد خاقان عباسی

سابق وزیراعظم اور عوامِ پاکستان پارٹی کے سربراہ شاہد خاقان عباسی نے کہا ہے کہ موجودہ سیاست میں نہ عزت باقی رہی ہے اور نہ ہی عوام کی خدمت کا جذبہ، جبکہ ملک اپنے مسائل کے گرداب میں پھنسا ہوا ہے۔ ان کے مطابق آج کے حکمران مایوسی اور بےبسی کی تصویر بنے ہوئے ہیں۔ پارٹی کے یومِ تاسیس کے موقع پر خطاب کرتے ہوئے شاہد خاقان عباسی نے کہا کہ حکومت کوئی ایک ایسا کام بتائے جس سے عوام کی فلاح ہوئی ہو یا نوجوانوں کے مسائل حل ہوئے ہوں۔ اربوں روپے خرچ کیے جا رہے ہیں، مگر تعلیم اور صحت کے نظام میں بہتری نظر نہیں آتی۔ ان کا کہنا تھا کہ جب تک یہی حکمران اقتدار میں رہیں گے، ان کا ہر لمحہ ملک پر بوجھ بنا رہے گا۔ انصاف کا نظام جب مفلوج ہو جائے تو ملک کی ترقی رک جاتی ہے۔ آج کی سیاست صرف گالم گلوچ تک محدود ہو گئی ہے اور حکمرانوں میں کوئی مثبت سوچ نظر نہیں آتی شاہد خاقان عباسی کا یہ بھی کہنا تھا  کہ ہماری جماعت ایسی ہوگی جو ملک اور اسکے مسائل کی بات کرے گی، ملک کے آدھے لوگ خط غربت سے نیچے چلے گئے ہیں۔