آئندہ 50 دنوں میں یوکرین کے ساتھ امن معاہدہ کریں،ٹرمپ نےروس کو خبردار کردیا

صدر ڈونلڈ ٹرمپ نے روس کو خبردار کیا ہے کہ اگر آئندہ 50 دنوں کے اندر یوکرین کے ساتھ امن معاہدہ نہ ہوا تو امریکہ روس پر اضافی 100 فیصد ٹیرف عائد کرے گا۔یہ بیان انہوں نے نیٹو کے سیکرٹری جنرل مارک روٹے سے اوول آفس میں ملاقات کے بعد میڈیا سے گفتگو کرتے ہوئے دیا۔ ٹرمپ نے کہا کہ وہ روسی صدر ولادیمیر پیوٹن سے ناراض ہیں، کیونکہ پیوٹن کو دو ماہ قبل ہی امن معاہدہ کر لینا چاہیے تھا، لیکن انہوں نے ایسا نہیں کیا۔ٹرمپ نے مزید کہا کہ روس کو امن کے لیے 50 دن کی مہلت دی جا رہی ہے، اور اگر وہ اس مدت میں معاہدہ نہ کر پایا تو اسے سخت معاشی نتائج کا سامنا کرنا پڑے گا۔ ساتھ ہی انہوں نے یوکرین کو پیٹریاٹ میزائل دفاعی نظام فراہم کرنے کا اعلان کیا تاکہ یوکرین روسی حملوں سے بہتر انداز میں اپنا دفاع کر سکے۔ٹرمپ نے اس موقع پر کہا کہ "تجارت جنگوں کے خاتمے کا مؤثر ذریعہ ہے۔ ہم نے ماضی میں پاکستان اور بھارت کے درمیان ممکنہ جوہری جنگ کو بھی روکنے میں کردار ادا کیا۔”انہوں نے مزید کہا کہ امریکہ تجارتی ٹیرف پر یورپی یونین اور دیگر ممالک سے بات چیت کے لیے تیار ہے، اور یورپی حکام اس سلسلے میں مذاکرات کے لیے آرہے ہیں۔یاد رہے کہ دو روز قبل صدر ٹرمپ نے یورپی یونین اور میکسیکو پر 30 فیصد درآمدی ٹیکس عائد کرنے کا اعلان کیا تھا، جو یکم اگست سے نافذ العمل ہوں گے۔