ملک بھر میں بارشیں اور سیلاب،24گھنٹوں میں مزید7افراد جاں بحق

محکمہ موسمیات کے مطابق مون سون کا موجودہ سلسلہ آئندہ ایک سے دو روز تک ملک کے مختلف علاقوں میں شدید بارشوں کا سبب بنے گا۔ اس دوران بالائی علاقوں میں لینڈ سلائیڈنگ جبکہ اسلام آباد، راولپنڈی، گوجرانوالہ، لاہور، سیالکوٹ، نوشہرہ اور پشاور کے نشیبی علاقوں میں اربن فلڈنگ کا خطرہ ہے۔ برساتی ندی نالوں میں طغیانی کا خدشہ بھی ظاہر کیا گیا ہے۔نیشنل ڈیزاسٹر مینجمنٹ اتھارٹی (این ڈی ایم اے) کے مطابق گزشتہ 24 گھنٹوں کے دوران بارشوں اور سیلاب سے متعلقہ حادثات میں مزید 7 افراد جان کی بازی ہار گئے جبکہ 15 زخمی ہوئے۔ 26 جون سے شروع ہونے والی مون سون بارشوں کے باعث اب تک مجموعی طور پر 288 افراد جاں بحق اور 690 زخمی ہو چکے ہیں