پاکستان اور ایران کے مابین 13 معاہدوں اور مفاہمت کی یادداشتوں پر دستخط

پاکستان اور ایران کے درمیان تجارت سلامتی دفاع، ٹیکنالوجی سمیت مفاہمت کے 13یاد داشتوں پر دستخط ہوگئے ہیں،یہ تقریب وزیراعظم ہاؤس میں منعقد ہوئی جس میں دونوں ممالک کے وفود نے شرکت کی،تقریب میں ان معاہدوں پر دستخط اور دستاویزات کا تبادلہ کیا گیا۔ اس موقع پر وزیراعظم شہباز شریف، وفاقی کابینہ کے ارکان، ایرانی صدر اور ان کے ہمراہ وفد نے شرکت کی۔پاکستان اور ایران کے درمیان سائنس و ٹیکنالوجی اور انفارمیشن ٹیکنالوجی کے شعبوں میں علیحدہ علیحدہ معاہدے کیے گئے۔ سیاحت، ثقافت اور تاریخی ورثے کے تبادلے کے لیے بھی معاہدہ طے پایا، جبکہ موسمیاتی تبدیلی، قدرتی آفات سے نمٹنے اور میٹرالوجی کے میدان میں بھی تعاون پر دستخط ہوئے۔اس کے علاوہ میری ٹائم سیفٹی، فائر فائٹنگ، عدالتی معاونت اور اصلاحات کے حوالے سے مفاہمتی یادداشتوں پر بھی دستخط کیے گئے۔ سال 2013 میں طے پانے والے ایئر سیفٹی معاہدے کے تحت ایک ذیلی ایم او یو کا تبادلہ بھی ہوا۔مصنوعات کے معیار پر عملدرآمد، سیاحتی اور ثقافتی تعاون کے حوالے سے ایم او یوز پر دستخط کیے گئے، جبکہ دونوں ممالک نے فری ٹریڈ ایگریمنٹ پر عملدرآمد کے لیے مشترکہ بیان کی تیاری پر بھی معاہدہ کیا۔