ڈرائیونگ لائسنس کے حصول کا نیا طریقہ کار اور فیس شیڈول جاری

ڈرائیونگ لائسنس کے حصول کا نیا طریقہ کار اور فیس شیڈول جاری کر دیا گیا ہے، جس کے مطابق شہری اب اپنی ضرورت کے مطابق ایک سے پانچ سال تک کے لیے ڈرائیونگ لائسنس بنوا سکتے ہیں۔ حکام کے مطابق پنجاب سمیت ملک بھر میں درست ڈرائیونگ لائسنس کا ہونا لازمی قرار دیا گیا ہے اور بغیر لائسنس گاڑی چلانے والوں کو بھاری جرمانے اور قانونی کارروائی کا سامنا کرنا پڑے گا۔ٹریفک پولیس کے مطابق ڈرائیونگ لائسنس اس بات کی ضمانت ہے کہ ڈرائیور نے ضروری ٹیسٹ کامیابی سے مکمل کیے ہیں اور ٹریفک قوانین سے آگاہ ہے، جس سے حادثات میں کمی اور سڑکوں پر نظم و ضبط برقرار رہتا ہے۔ یہ قانونی طور پر گاڑی چلانے کی اجازت کا ثبوت بھی ہے۔لائسنس بنوانے کے لیے سب سے پہلے شہریوں کو لرنر لائسنس حاصل کرنا لازمی ہوگا، جس کی فیس 500 روپے ہے اور یہ آن لائن بھی بنایا جا سکتا ہے۔ اس کے بعد امیدوار کو مقررہ سینٹر پر جا کر تھیوری اور عملی امتحان دینا ہوگا۔ ٹیسٹ پاس کرنے کے بعد ریگولر لائسنس جاری کیا جاتا ہے۔پنجاب میں کار ڈرائیونگ لائسنس کے لیے ٹیسٹ فیس 150 روپے مقرر کی گئی ہے، جبکہ لائسنس کے اجراء پر 1,350 روپے اور کوریئر سروس کے لیے 480 روپے ادا کرنے ہوں گے، یوں ایک سالہ ڈرائیونگ لائسنس کی مجموعی لاگت تقریباً 1,830 روپے بنتی ہے۔ محکمہ ٹریفک پولیس کے مطابق شہری اپنی سہولت کے مطابق ایک سے پانچ سال تک کے لیے ڈرائیونگ لائسنس بنوا سکتے ہیں، جس کی فیس شیڈول مدت کے لحاظ سے مختلف ہوگی۔