سکھر: میئر سکھر اور ترجمان حکومتِ سندھ، بیرسٹر ارسلان اسلام شیخ نے کہا ہے کہ ایشین ڈویلپمنٹ بینک (ADB) کے مشن کے ساتھ سکھر کے مستقبل کے لیے ایک بڑے منصوبے پر اہم میٹنگ ہوئی ہے، جس کا مقصد سکھر کو جدید سہولیات سے آراستہ کرنا اور بین الاقوامی معیار کا شہر بنانا ہے۔انہوں نے بتایا کہ منصوبے میں سب سے زیادہ توجہ ماحولیاتی تبدیلی (Climate Change) کے چیلنجز سے نمٹنے اور ماحول دوست ترقی کو فروغ دینے پر دی گئی ہے۔ اس حوالے سے جامع حکمتِ عملی تیار کی گئی ہے جس میں درج ذیل نکات شامل ہیں
کلائمیٹ چینج اور ماحولیاتی تحفظ: ماحول دوست اقدامات، کاربن اخراج میں کمی اور پائیدار ترقی کے لیے عملی اقدامات کیے جائیں گے۔ شجرکاری اور سبزہ زاروں کا فروغ: بڑے پیمانے پر شجرکاری مہم، پارکس اور گرین اسپیسز کی توسیع کی جائے گی تاکہ شہریوں کو خوشگوار ماحول فراہم کیا جا سکے۔ قابلِ تجدید توانائی (Renewable Energy): شمسی توانائی اور دیگر رینیوایبل ذرائع کے استعمال سے توانائی کی ضروریات پوری کی جائیں گی۔ الیکٹرک وہیکلز کے فروغ کے اقدامات: شہر میں الیکٹرک گاڑیوں کے لیے چارجنگ اسٹیشنز اور دیگر سہولیات فراہم کی جائیں گی۔ ڈرینیج اور سیوریج سسٹم کی بہتری: بارش اور سیلابی پانی کے مؤثر اخراج اور پرانے سیوریج نظام کی اپ گریڈیشن کی جائے گی۔ پانی کے مسائل کا حل: جدید واٹر مینجمنٹ سسٹم اور صاف پانی کی فراہمی کو یقینی بنایا جائے گا۔ٹریفک کے مسائل کا حل: جدید ٹریفک مینجمنٹ، انڈر پاسز اور بہتر پبلک ٹرانسپورٹ کے انتظامات کیے جائیں گے۔
بیرسٹر ارسلان اسلام شیخ نے کہا کہ یہ منصوبہ سکھر کے شہریوں کے معیارِ زندگی کو بہتر بنانے، ماحول دوست ترقی کو فروغ دینے اور شہر کو ایک ماڈل انٹرنیشنل سٹی میں تبدیل کرنے کے لیے فیصلہ کن ثابت ہوگا۔
