خیبر پختونخوا میں دہشت گردی کے واقعات میں تشویشناک اضافہ، 8 ماہ میں 605 واقعات رپورٹ

پشاور: سنٹرل پولیس آفس (سی پی او) کی جاری کردہ رپورٹ کے مطابق خیبر پختونخوا میں رواں سال کے دوران دہشت گردی کے واقعات میں خطرناک اضافہ ہوا ہے۔ گزشتہ آٹھ ماہ کے دوران 605 دہشت گردی کے واقعات رپورٹ کیے گئے۔رپورٹ میں بتایا گیا ہے کہ ان واقعات میں 138 عام شہری جاں بحق اور 352 زخمی ہوئے، جبکہ 79 پولیس اہلکار شہید اور 130 زخمی ہوئے۔ صرف گزشتہ ماہ ہی دہشت گردی کے 129 واقعات ریکارڈ کیے گئے۔
سی پی او کے مطابق، دہشت گردی کے ان واقعات میں 351 ملزمان کو نامزد کیا گیا، جن میں سے 32 ہلاک اور 5 گرفتار ہوئے۔ اگست کے مہینے میں 13 پولیس اہلکار شہید اور 46 زخمی ہوئے، جبکہ 17 عام شہری بھی دہشت گردوں کا نشانہ بنے اور 51 زخمی ہوئے۔رپورٹ میں مزید بتایا گیا کہ گزشتہ ماہ سب سے زیادہ 42 دہشت گردی کے واقعات رپورٹ ہوئے، جن میں 186 ملزمان نامزد اور 8 ہلاک کیے گئے۔علاقائی اعداد و شمار کے مطابق، شمالی وزیرستان میں 15، جنوبی وزیرستان میں 14 اور دیر میں 11 دہشت گردی کے واقعات پیش آئے۔