بلاول بھٹو کاوزیرِاعظم سے ٹیلیفونک رابطہ،کسانوں کےمسائل سے آگاہ کیا

چیئرمین پیپلز پارٹی بلاول بھٹو زرداری نے قصور میں سیلاب متاثرین سے ملاقات کے بعد وزیرِاعظم شہباز شریف سے ٹیلیفون پر رابطہ کیا اور پنجاب کے کسانوں کو درپیش مسائل سے آگاہ کیا۔بلاول بھٹو کا کہنا تھا کہ حالیہ سیلاب کے باعث پنجاب میں زرعی شعبے کو شدید نقصان پہنچا ہے، اس لیے وفاق کو صوبائی حکومت کے ساتھ مل کر کسانوں کے لیے ریلیف اقدامات کرنے چاہئیں۔ انہوں نے مطالبہ کیا کہ آفت زدہ اضلاع کے کسانوں کے بجلی کے بل معاف کیے جائیں اور زرعی قرضوں کی ادائیگی کا مسئلہ حل کیا جائے۔ سیلاب متاثرہ کسانوں کے قرضے یا تو معاف کیے جائیں یا ادائیگی میں سہولت فراہم کی جائے۔ اس کے ساتھ ساتھ آفت زدہ علاقوں کے کسانوں کی مدد کے لیے بینظیر انکم سپورٹ پروگرام کے تحت نقد امداد بھی فراہم کی جائے۔