کشمیر میڈیا سروس کے مطابق امریکہ میں مقیم کشمیری 27ستمبر کو اقوام متحدہ کی جنرل اسمبلی میں بھارتی مندوب کے خطاب کے موقع پر نیویارک میں عالمی ادارے کے ہیڈ کوارٹر کے سامنے پرامن احتجاج کرنے کی تیاری کر رہے ہیں۔کشمیر میڈیا سروس کے مطابق احتجاج کا مقصد عالمی توجہ حل طلب تنازعہ کشمیر کی طرف مبذول کرانا ہے جس کی وجہ سے رواں سال کے شروع میں بھارت اور پاکستان جوہری تصادم کے دہانے پر پہنچ گئے تھے۔ کشمیری کمیونٹی رہنمائوں نے ایک زوم کانفرنس میں زور دیا کہ عالمی طاقتوں کو کشمیری عوام کے ناقابل تنسیخ حق خود ارادیت کے لیے اپنے عزم کا اعادہ کرنا چاہیے اور اقوام متحدہ کی قراردادوں کے مطابق دیرینہ تنازعے کے منصفانہ حل کے لیے دبائو ڈالنا چاہیے۔اجلاس کے شرکا ء نے امریکہ میں مقیم کشمیریوں کے درمیان اتحاد کی ضرورت پر زور دیا تاکہ اس بات کو یقینی بنایا جا سکے کہ احتجاج موثر ہو۔ انہوں نے کہاکہ صرف ایک متحدہ قیادت ہی کمیونٹی کو کشمیر کاز کی حمایت کے لئے متحرک کر سکتی ہے۔اجلاس میں فیصلہ کیا گیا کہ سردار امتیاز خان، آفتاب شاہ اور سردار ساجد سوار سمیت کمیونٹی رہنما نیو جرسی میں کشمیری امریکیوں اور کشمیر کے دوستوں سے رابطہ کریں گے جبکہ لوگوں کی سہولت کے لیے نیو جرسی، بروکلین، کوئینز اور واشنگٹن ڈی سی سے بسوں کا انتظام کیا جائے گا۔ڈاکٹر امتیاز خان اور ڈاکٹر غلام نبی فائی واشنگٹن میٹروپولیٹن ایریا میں کمیونٹی ممبران کے ساتھ رابطہ کریں گے۔منتظمین نے ایک مضبوط سوشل میڈیا مہم کے ساتھ ساتھ نیو جرسی، پنسلوانیا، نیویارک اور واشنگٹن میں ذاتی فون کالز سمیت لوگوں سے بڑے پیمانے پر رابطہ کرنے کا فیصلہ کیا۔احتجاجی مظاہرے میں لوگوں کی زیادہ سے زیادہ شرکت کو یقینی بنانے کے لیے کمیونٹی سینٹرز سے بھی رابطہ کیا جائے گاتاکہ عالمی ادارے کو مسئلہ کشمیر کے حل کی فوری ضرورت کے بارے میں واضح پیغام دیا جاسکے۔
امریکہ میں مقیم کشمیری 27ستمبر کو نیویارک میں پرامن احتجاج کریں گے
Date:
