یورپی اقدامات کے بعدآئی اے ای اےسے تعاون معطل کر دیا جائے گا۔

تفصیلات کے مطابق صدر پزشکیان کی زیر صدارت ایران کی اعلیٰ قومی سلامتی کونسل کا اجلاس منعقد ہوا جس میں خطے کی موجودہ صورتحال اور اسرائیل کی جانب سے مہم جوئیوں پر تفصیلی غور کیا گیا۔ اجلاس میں یورپی ممالک کی جانب سے ایران کے جوہری پروگرام کے حوالے سے کیے گئے اقدامات پر تشویش کا اظہار کیا گیا اور فیصلہ کیا گیا کہ وزارتِ خارجہ کی جانب سے تعاون کے باوجود یورپی ممالک کے غیر تعمیری رویے کے سبب عالمی ایجنسی کے ساتھ عملی تعاون روک دیا جائے گا۔اعلیٰ سلامتی کونسل نے وزارتِ خارجہ کو یہ بھی ہدایت دی کہ ایران کے قومی مفادات کے تحفظ کے لیے عالمی سطح پر مذاکرات کا سلسلہ جاری رکھا جائے تاکہ ملک کے مؤقف کو موثر انداز میں پیش کیا جا سکے۔