آئی جی اسلام آباد سید علی ناصر رضوی نے اسلام آباد کے سیکٹر F-6 میں قائم عوامی سہولت مرکز کا دورہ کیا۔
آئی جی اسلام آباد نے سہولت مرکز میں آنے والے شہریوں سے ملاقات کی اور ان کے مسائل اور تجاویز کو بغور سنا۔ شہریوں کی خدمت پر مامور پولیس افسران کو ہدایت جاری کی کہ شہریوں کے ساتھ خوش اخلاقی، پیشہ وارانہ مہارت اور فوری تعاون کو یقینی بنایا جائے۔
دورے کے دوران آئی جی اسلام آباد نے اپنے ڈرائیونگ لائسنس کی تجدید بھی وہیں سے کرائی تاکہ شہریوں کو فراہم کی جانے والی سہولیات کا عملی طور پر جائزہ لیا جا سکے۔عوامی سہولت مراکز شہریوں اور پولیس کے درمیان رابطے کو مزید مؤثر بنانے کے لیے قائم کیے گئے ہیں، جہاں عوام کو بآسانی مختلف خدمات فراہم کی جاتی ہیں۔ انہوں نے افسران کو ہدایت دی کہ آنے والے ہر شہری کو عزت و احترام کے ساتھ پیشہ وارانہ انداز میں سہولیات دی جائیں تاکہ عوامی اطمینان اور اعتماد میں اضافہ ہو۔
