امریکی صدر ڈونلڈ ٹرمپ اور وزیر اعظم شہباز شریف کی غیر رسمی ملاقات

نیویارک (مانیٹرنگ ڈیسک) عرب اسلامی سربراہی اجلاس کے اختتام پر امریکی صدر ڈونلڈ ٹرمپ اور وزیر اعظم پاکستان شہباز شریف کے درمیان خوشگوار ماحول میں غیر رسمی ملاقات ہوئی۔ نجی ٹی وی چینل جیو نیوز کے مطابق دونوں رہنماؤں نے مصافحہ کیا جبکہ اس موقع پر نائب وزیراعظم اسحاق ڈار بھی موجود تھے۔ذرائع کے مطابق وزیراعظم شہباز شریف کی امریکی صدر سے 25 ستمبر کو ون آن ون ملاقات بھی متوقع ہے۔دوسری جانب اقوام متحدہ کی جنرل اسمبلی کے اجلاس کے موقع پر میڈیا سے گفتگو کرتے ہوئے وزیراعظم شہباز شریف نے کہا کہ امریکی صدر دنیا میں امن قائم کرنے کے لیے کام کر رہے ہیں۔ ان کا مزید کہنا تھا کہ صدر ٹرمپ نے جنرل اسمبلی سے خطاب میں اہم نکات اٹھائے اور پاک بھارت جنگ بندی کرانے میں بھی نمایاں کردار ادا کیا۔