ایشیا کپ،41 سالہ تاریخ میں پہلی مرتبہ پاکستان اور بھارت فائنل میں آمنے سامنے ہوں گے

پاکستان نے بنگلہ دیش کو سنسنی خیز مقابلے کے بعد 11 رنز سے شکست دے کر ایشیا کپ کے فائنل میں رسائی حاصل کرلی، جہاں اس کا مقابلہ روایتی حریف بھارت سے ہوگا۔ایشیا کپ کی 41 سالہ تاریخ میں یہ ایک حیران کن حقیقت ہے کہ پاکستان اور بھارت کبھی بھی فائنل میں ایک دوسرے کے آمنے سامنے نہیں آئے۔ 1984 سے 2023 تک ایونٹ کے 16 ایڈیشن کھیلے جا چکے ہیں، جن میں دونوں ٹیمیں متعدد بار مدِ مقابل آئیں، لیکن کبھی فائنل میں ٹکراؤ نہ ہوسکا۔ یہ پہلا موقع ہے کہ دونوں روایتی حریف فائنل میں مدمقابل ہوں گے۔گروپ اور سپر فور مرحلے میں پاکستان کو بھارت کے ہاتھوں شکست کا سامنا کرنا پڑا تھا، تاہم کپتان سلمان آغا فائنل میں جیت کے لیے پرامید ہیں۔ شائقین کرکٹ 28 ستمبر کو پہلی مرتبہ ایشیا کپ کے فائنل میں پاکستان اور بھارت کے درمیان فیصلہ کن مقابلہ دیکھ سکیں گے۔اعداد و شمار کے مطابق بھارت اب تک سب سے زیادہ 8 مرتبہ ایشیا کپ کا ٹائٹل جیت چکا ہے، سری لنکا 6 بار فاتح رہا، جبکہ پاکستان نے یہ اعزاز 2 مرتبہ اپنے نام کیا ہے۔