نیتن یاہو کے خطاب کے دوران اقوام متحدہ کی عمارت کے باہر احتجاج

اقوامِ متحدہ کی جنرل اسمبلی میں اسرائیلی وزیراعظم نیتن یاہو کے خطاب کے موقع پر عمارت کے باہر بڑی تعداد میں مظاہرین نے احتجاج کیا۔مظاہرین نے ہاتھوں میں غزہ کے معصوم بچوں کی تصاویر اور پلے کارڈز اٹھا رکھے تھے جن پر غزہ کو آزاد کرو اور غزہ کے عوام کو جینے دو جیسے نعرے درج تھے۔ شرکا نے صیہونی مظالم کے خلاف شدید نعرے بازی کی اور نیتن یاہو کی گرفتاری کے ساتھ ساتھ اسرائیل پر عالمی پابندیاں عائد کرنے کا مطالبہ بھی کیا۔
دوسری جانب اجلاس کے اندربھی اسرائیلی وزیراعظم کو شدید مخالفت کا سامنا کرنا پڑا۔نیتن یاہو جیسے ہی خطاب کے لیے ڈائس پر آئے تو پاکستان سمیت کئی ممالک کےوفود اور مسلم ممالک کے رہنماؤں نے ان کی تقریر کا بائیکاٹ کرتے ہوئے اجلاس سے واک آؤٹ کیا۔صورتحال اس قدربگڑ گئی کہ جنرل اسمبلی کے منتظمین بار بارآرڈر، آرڈر پکارتے رہے مگر دیکھتے ہی دیکھتے ہال تقریباً خالی ہوگیا اور نیتن یاہو صرف چند افراد کے سامنے خطاب کرتے رہ گئے۔