دوسرے چیف آف دی نیول اسٹاف انٹرنیشنل سیلنگ ریگاٹا کی شاندار اختتامی تقریب کراچی میں منعقد ہوئی جس کے مہمانِ خصوصی صوبائی وزیر برائے ثقافت، سیاحت، نوادرات و آرکائیوز ذوالفقار علی شاہ تھے۔
ہفتہ بھر جاری رہنے والی اس بین الاقوامی سیلنگ چیمپئن شپ میں پاکستان، مصر، ایران، ملائیشیا، سری لنکا اور تھائی لینڈ کے ماہر سیلرز نے شرکت کی۔ ایونٹ کے دوران ہر کیٹگری میں مجموعی طور پر 12 مقابلے ہوئے۔پاکستان اور ملائیشیا کے کھلاڑی ایک، ایک سونے، چاندی اور کانسی کا تمغہ جیت کر سرِ فہرست رہے۔
مہمانِ خصوصی ذوالفقار علی شاہ نے اپنے خطاب میں خطے میں سیلنگ اور واٹر اسپورٹس کے فروغ کے لیے پاک بحریہ کی کاوشوں کو سراہا اور اس عزم کا اظہار کیا کہ سندھ حکومت کھیلوں کے فروغ کے لیے ہر ممکن تعاون فراہم کرے گی۔
تقریب کے اختتام پر مہمانِ خصوصی نے مختلف کیٹگریز کے فاتح اور رنر اپ کھلاڑیوں میں انعامات تقسیم کیے۔ اس موقع پر سول و ملٹری حکام، غیر ملکی سفارت کاروں اور میڈیا نمائندگان کی بڑی تعداد بھی موجود تھی۔
