فرانس،پکڑے گئے روس کےآئل ٹینکر کےعملے کے2افراد کوحراست میں لے لیا گیا

فرانس کے ساحل کے قریب پکڑے گئے روس کےمبینہ شیڈو فلیٹ کے ایک ٹینکر کے دو عملے کے افراد کو بدھ کے روز حراست میں لے لیا گیا، مغربی فرانسیسی بندرگاہ بریسٹ کے پراسیکیوٹر کے مطابق۔اس ٹینکر پرڈنمارک میں ڈرون پروازوں میں ملوث ہونے کا شبہ ہے، اور گرفتار کیے گئے دونوں افراد نے خود کو جہاز کے کپتان اور فرسٹ میٹ کے طور پر ظاہر کیا، بریسٹ کے پراسیکیوٹر اسٹیفان کیلنبرگر نے بتایا۔پراسیکیوٹر کے مطابق ابتدائی تحقیقات کا تعلق جہاز کی قومیت کے ثبوت فراہم نہ کرنے اور احکامات کی تعمیل سے انکار سے ہے، جس کی زیادہ سے زیادہ سزا ایک سال قید اور 1,50,000 یورو (1,75,000 ڈالر) جرمانہ ہے۔بدھ کی صبح فرانسیسی مسلح افواج نے بورا کائے نامی ٹینکر پر بورڈنگ کی تھی، جو بینن کے پرچم تلے رجسٹرڈ ہے اور یورپی یونین نے اسے روس کے پرانے آئل ٹینکروں کے اس بیڑے کا حصہ قرار دے کر بلیک لسٹ کیا ہے جو پابندیوں کو توڑنے کے لیے استعمال ہوتے ہیں۔صدر ایمانویل میکرون نے کہا کہ فرانس اس ٹینکر کی سنگین خلاف ورزیوں پر تحقیقات کر رہا ہے، تاہم انہوں نے ڈنمارک کی پراسرار ڈرون پروازوں سے اس کے کسی تعلق کی تصدیق نہیں کی۔فرانسیسی حکام نے بورا کائے کے خلاف تحقیقات شروع کر دی ہیں، جو فرانس کے اٹلانٹک ساحل پر لنگر انداز ہے اور یورپی یونین کی بلیک لسٹ میں شامل ہے۔میکرون نے کوپن ہیگن میں یورپی یونین کے رہنماؤں کے اجلاس میں صحافیوں سے بات کرتے ہوئے کہا:اس عملے نے کچھ بہت سنگین خلاف ورزیاں کی ہیں، جو موجودہ عدالتی کارروائی کو جائز قرار دیتی ہیں۔یہ جہاز 2007 میں بنایا گیا تھا اور اسے مختلف اوقات میں پُشپا اور کیوالا کے نام سے جانا جاتا رہا ہے۔ بورا کائے کئی دنوں سے مغربی فرانس کے ساحل سینٹ نازیئر کے قریب لنگر انداز تھا۔خصوصی ویب سائٹ دی میری ٹائم ایگزیکٹو کے مطابق، اس جہاز پر شبہ ہے کہ یہ ان پراسرار ڈرون پروازوں میں شامل تھا جنہوں نے ستمبر میں ڈنمارک میں فضائی ٹریفک کو متاثر کیا۔رپورٹ کے مطابق یہ ٹینکر اور دیگر جہاز ممکنہ طور پر ڈرون لانچ پلیٹ فارم یا ڈیکوائے کے طور پر استعمال کیے گئے۔تاہم جب ان دعوؤں پر میکرون سے پوچھا گیا تو انہوں نے کہا کہ وہ بہت محتاط رہیں گے، کیونکہ بورا کائے اور ڈرون پروازوں کے درمیان تعلق قائم کرنا ان کا کام نہیں ہے۔یورپی یونین نے روس کے سیکڑوں پرانے آئل ٹینکروں پر پابندی لگائی ہے جو 2022 میں یوکرین پر حملے کے بعد عائد تیل کی برآمدی پابندیوں کو توڑنے کے لیے استعمال ہوتے ہیں۔ان میں بورا کائے بھی شامل ہے جسے فروری میں کیوالا کے نام سے بلیک لسٹ کیا گیا تھا۔شمال مغربی فرانسیسی شہر بریسٹ کے پبلک پراسیکیوٹر کے دفتر نے بتایا کہ بحریہ کی رپورٹ کے بعد تحقیقات شروع کر دی گئی ہیں۔بریسٹ کے پراسیکیوٹر اسٹیفان کیلنبرگر نے اے ایف پی کو بتایا کہ تحقیقات اس لیے شروع کی گئی ہیں کیونکہ عملہ جہاز کی قومیت کا جواز پیش کرنے میں ناکام رہا اور تعاون سے انکار کیا۔