وفاقی وزیر دفاع خواجہ آصف نے اپنے ایکس اکاؤنٹ پر جاری پیغام میں آزاد کشمیر کے عوام سے پرامن رہنے کی اپیل کی ہے۔خواجہ آصف نے کہا کہ احتجاج کرنے والے حضرات مقبوضہ کشمیر کی تین نسلوں کی جدوجہد پر غور کریں، جنہیں وہ سہولتیں بھی میسر نہیں جو آج آزاد کشمیر کے عوام کو حاصل ہیں۔وزیر دفاع کے مطابق کشمیری عوام نے آزادی کی تاریخ اپنے خون سے لکھی ہے،
ایک نسل نے جیلوں میں جوانی گزاری، ہزاروں نے پھانسی کے پھندے قبول کیے اور سینوں پر گولیاں کھا کر قربانیاں دیں۔انہوں نے کہا کہ پاکستان کے فوجی جوان جنہوں نے کشمیر کی جنگوں میں جانیں قربان کیں، ان میں پنجابی، پختون، بلوچ، سندھی، گلگتی اور بلتی سب شامل ہیں۔خواجہ آصف نے کہا کہ پاکستان نے ہمیشہ کشمیر کی آزادی کے لیے اپنا وجود داؤ پر لگایا ہے اور یہ قربانی دینا ہمارے ایمان کا جز ہے۔
انہوں نے بتایا کہ ان کے انتخابی حلقے سیالکوٹ میں کشمیری مہاجرین کی بڑی تعداد آباد ہے۔ اکتوبر 1947 میں جموں-سیالکوٹ بارڈر عبور کرتے ہوئے ایک لاکھ کشمیری مسلمان شہید ہوئے، ہزاروں عورتیں بے حرمتی کا نشانہ بنیں اور اغوا ہو گئیں۔وزیر دفاع نے کہا کہ بجوات، حاجی پورہ اور پکا گڑھا کیمپ کے ہر گھر میں ایسے لوگ بستے ہیں جنہوں نے پاکستان سے محبت کی قیمت اپنی جانوں سے ادا کی۔
