پشاور میں پی ٹی آئی کے جلسے میں پیش آنے والی بے نظمی کی تحقیقات مکمل کر لی گئیں۔

فیکٹ فائنڈنگ کمیٹی کی رپورٹ میں انکشاف ہوا ہے کہ 27 ستمبر کے جلسے میں اسٹیج مینجمنٹ متعدد گروپوں کے سپرد ہونے کی وجہ سے مکمل بدانتظامی پیدا ہوئی۔ ناکافی انتظامات اور غیر واضح انٹری پروٹوکولز کے باعث کارکنان میں سخت مایوسی پھیلی۔رپورٹ کے مطابق وزیراعلیٰ کے ترجمان فراز مغل نے 100 سے زائد ریڈ پاسز جاری کیے اور پارٹی رہنماؤں و کارکنوں کے ساتھ نامناسب رویہ اختیار کیا۔ مزید یہ کہ بعض پولیس اہلکاروں کا برتاؤ غیر اخلاقی جبکہ خواتین کے ساتھ ناروا تھا۔تحقیقات میں یہ بات بھی سامنے آئی کہ چیئرمین تحصیل متھرا انعام اللہ کے رویے نے کارکنوں میں شدید ناراضی پیدا کی۔ جلسے کے دوران وزیراعلیٰ علی امین گنڈاپور کی تقریر کے وقت اسٹیج پر جوتے اور بوتلیں پھینکی گئیں، جس سے صورتحال مزید کشیدہ ہو گئی۔