بھارت معرکہ حق میں پاکستان کا کوئی بھی طیارہ نہیں گراسکا: پاک فوج

ڈی جی آئی ایس پی آرلیفٹیننٹ جنرل احمد شریف چودھری نے امریکی جریدے بلومبرگ کو دیے گئے ایک خصوصی انٹرویو میں کہا ہے کہ معرکۂ حق میں بھارت پاکستان کا کوئی بھی طیارہ نہیں گرا سکا۔انہوں نے بتایا کہ پاک فوج کی ترقیاتی حکمتِ عملی ہمیشہ سے مؤثر، کارگر پلیٹ فارمز اور اندرونی پاکستانی ٹیکنالوجی کے فروغ پر مرکوز رہی ہے۔ ان کا کہنا تھا کہ پاکستان ہر قسم کی ٹیکنالوجی خواہ وہ مقامی ہو، مشرقی یا مغربی  کے حصول کے لیے تیار ہے، تاہم پاکستان کا مقصد بھارت کے ساتھ ہتھیاروں کی دوڑ میں شامل ہونا نہیں بلکہ دفاعی خود انحصاری حاصل کرنا ہے۔لیفٹیننٹ جنرل احمد شریف چودھری نے واضح کیا کہ پاکستان نے کبھی بھی حقائق یا اعداد و شمار سے کھیلنے یا انہیں چھپانے کی کوشش نہیں کی۔ انہوں نے ایک بار پھر دو ٹوک انداز میں کہا کہ بھارت معرکۂ حق میں پاکستان کاکوئی بھی طیارہ گرانےمیں ناکام رہا۔انٹرویو کےدوران ڈی جی آئی ایس پی آر نے پاکستانی ہتھیاروں اورچینی ساختہ پلیٹ فارمز کی معرکۂ حق میں شاندار کارکردگی کی بھی تصدیق کی۔بلومبرگ کی رپورٹ کے مطابق، امریکی صدر ڈونلڈ ٹرمپ ایک ہفتہ قبل اس بات کی تصدیق کر چکے ہیں کہ معرکۂ حق کے دوران سات بھارتی طیارے مار گرائے گئے۔ رپورٹ میں مزید بتایا گیا کہ پاکستان کے چینی ساختہ J-10C طیاروں نے رافیل سمیت بھارتی فضائیہ کے متعدد طیاروں کو نشانہ بنایا۔بلومبرگ کے مطابق، پاکستان نے اگست میں Z-10ME حملہ آور ہیلی کاپٹر کو اپنے ہتھیاروں کے ذخیرے میں شامل کرنے کا اعلان بھی کیا، جبکہ پاکستان چینی ہتھیاروں کے ساتھ ساتھ امریکی ساختہ F-16 طیارے بھی استعمال کرتا ہے۔تجزیہ کاروں کے مطابق، یہ انٹرویو پاکستان کی دفاعی خودمختاری، ٹیکنالوجی کے فروغ اور حقیقت پر مبنی بیانیے کی عکاسی کرتا ہے۔