افغان فورسز کی بلا اشتعال جارحیت خطے کے امن کے لیے ایک سنگین خطرہ ہے،بلاول بھٹو زرداری

پاکستان پیپلز پارٹی کے چیئرمین بلاول بھٹو زرداری نے کہا ہے کہ افغان فورسز کی جانب سے بلا اشتعال جارحیت خطے کے امن و استحکام کے لیے ایک سنگین خطرہ ہے۔پاک افغان سرحد کی حالیہ صورتحال پر گہری تشویش کا اظہار کرتے ہوئے بلاول بھٹو زرداری نے کہا کہ افغان حکام کو چاہیے کہ وہ علاقائی امن کے مفاد میں تحمل، تدبر اور ذمہ داری کا مظاہرہ کریں۔ان کاکہنا تھاکہ افغان فورسز کی بلا اشتعال کارروائیاں نہ صرف علاقائی امن و استحکام بلکہ مشترکہ خوشحالی کے لیے جاری اجتماعی کوششوں کے لیے بھی نقصان دہ ہیں۔ انہوں نے اس موقع پر کہا کہ پاکستان کی مسلح افواج نے عزم، صبر اور اعلیٰ پیشہ ورانہ مہارت کے ساتھ افغان فوج کے حملے کا مؤثر جواب دیا۔بلاول بھٹو زرداری نےکہا کہ دہشت گردگروہ صرف پاکستان کے لیےہی نہیں بلکہ پورے خطے کےامن، ترقی اور مستقبل کے لیے خطرہ ہیں۔ پاکستان ہمیشہ سے ایک پرامن، مستحکم اور خوشحال افغانستان کا خواہاں رہا ہے۔انہوں نے طالبان قیادت سے مطالبہ کیا کہ وہ دیرپا امن اور استحکام کے قیام کے لیے عملی اور نتیجہ خیز مذاکرات میں شریک ہوں۔ بلاول بھٹو زرداری کا کہنا تھا کہ پاکستان کی مستقل پالیسی ہمسایہ ممالک کے ساتھ خوشگوار اور تعاون پر مبنی تعلقات رکھنا ہے، اس لیے عبوری افغان حکومت کو یہ یقینی بنانا ہوگا کہ افغان سرزمین پاکستان کے خلاف استعمال نہ ہو۔آخر میں انہوں نے امید ظاہر کی کہ پاکستان اور افغانستان باہمی احترام، امن اور ترقی کے جذبے کے تحت خطے اور اس سے آگے کے استحکام و خوشحالی کے لیے مل کر کام کریں گے۔