پرامن افغانستان ترجیح،مگر پاکستان کی سلامتی پر سمجھوتہ نہیں ہوگا: صدر آصف زرداری

صدرِ مملکت آصف علی زرداری نے افغانستان کی حالیہ جارحیت پر ردِعمل دیتے ہوئے واضح کیا کہ پاکستان اپنے قومی مفادات، علاقائی خودمختاری اور سلامتی کے تحفظ کے لیے مکمل طور پر پرعزم ہے۔صدر آصف علی زرداری نے کہا کہ پاکستان جموں و کشمیر سے متعلق کسی بھی متنازعہ یا گمراہ کن مؤقف کو کبھی تسلیم نہیں کرے گا۔ بھارت کے غیر قانونی دعوے بین الاقوامی قوانین اور اقوامِ متحدہ کی قراردادوں کی صریح خلاف ورزی ہیں۔صدرِ مملکت نے افسوس ظاہر کیا کہ افغان قیادت نے مقبوضہ جموں و کشمیر کے مظلوم عوام کی جدوجہدِ آزادی سے کنارہ کشی اختیار کر کے تاریخ اور امتِ مسلمہ دونوں کے ساتھ ناانصافی کی ہے۔ انہوں نے کہا کہ اقوامِ متحدہ کی رپورٹوں سے بھی یہ حقیقت ثابت ہو چکی ہے کہ عبوری افغان حکومت کی سرزمین سے فتنہ الخوارج کے حملے ہو رہے ہیں۔ پاکستان بارہا واضح کر چکا ہے کہ فتنہ الخوارج اور فتنہ الہندوستان کے گٹھ جوڑ سے پاکستان کے شہری اور سیکیورٹی اہلکار نشانہ بن رہے ہیں۔صدر زرداری نے افغان قیادت پر زور دیا کہ وہ پاکستان مخالف دہشت گرد گروہوں کے خاتمے کے لیے مؤثر اور عملی اقدامات کرے۔ ان کا کہنا تھا کہ فتنہ الخوارج اور فتنہ الہندوستان خطے کے امن و استحکام کے سب سے بڑے خطرات ہیں، جبکہ دہشت گردی کے خلاف جنگ مشترکہ ذمہ داری ہے، جس کا بوجھ کسی ایک ملک پر نہیں ڈالا جا سکتا۔انہوں نے کہا کہ پاکستان نے گزشتہ چار دہائیوں تک افغان عوام کی میزبانی کر کے اسلامی اخوت اور اچھے ہمسائیگی کی مثال قائم کی۔ امن کی بحالی کے ساتھ افغان شہریوں کی باعزت وطن واپسی دونوں ملکوں کے مفاد میں ہے۔صدرِ پاکستان نے اس عزم کا اعادہ کیا کہ پاکستان افغان عوام کی تعلیمی اور انسانی ضروریات کے لیے تعاون جاری رکھے گا، تاہم اپنی قومی خودمختاری پر کوئی سمجھوتہ نہیں کرے گا۔ پاکستان نے تجارت، معیشت اور روابط کے فروغ کے لیے افغانستان کو ہمیشہ سہولت فراہم کی ہے۔انہوں نے مزید کہا کہ باہمی تعاون اور معاشی شراکت ہی خطے میں پائیدار امن و ترقی کی بنیاد ہے۔ پاکستان ایک پرامن، مستحکم اور خوشحال افغانستان کا خیرخواہ ہے۔ برادرانہ تعلقات باہمی احترام، سیکیورٹی تعاون اور علاقائی امن سے وابستہ ہیں۔ صدرِ مملکت نے توقع ظاہر کی کہ عبوری افغان حکومت اپنی سرزمین کو فتنہ الخوارج اور فتنہ الہندوستان کے دہشت گرد عناصر کے استعمال سے روکے گی، کیونکہ مشترکہ اور عملی اقدامات ہی دیرپا امن کی ضمانت ہیں۔