افغانستان سے تعلق رکھنے والے معروف صحافی سمیع یوسفزئی نے دعویٰ کیا ہے کہ پاکستان کی جانب سے افغان دارالحکومت کابل پر کیا گیا فضائی حملہ دراصل غیر ملکی جنگجوؤں کو نشانہ بنانے کے لیے کیا گیا تھا۔
اپنی سوشل میڈیا پوسٹ (ایکس) میں سمیع یوسفزئی نے بتایا کہ پاک فضائیہ کی جانب سے کیے گئے اس حملے میں درجنوں افراد ہلاک جبکہ تقریباً 300 افراد زخمی ہوئے۔
ان کے مطابق یہ حملہ شہید گول چکر کے قریب کیا گیا۔یوسفزئی نے ذرائع کے حوالے سے بتایا کہ فضائی حملے کے نتیجے میں ایک آئل ٹینکر میں آگ بھڑک اٹھی جو دیکھتے ہی دیکھتے پورے علاقے میں پھیل گئی۔
افغان صحافی کے مطابق، پاکستانی فضائی حملے کا ہدف وہ گھر تھے جن میں غیر ملکی جنگجو رہائش پذیر تھے۔
انہوں نے یہ بھی انکشاف کیا کہ واقعے کو چھپانے کے لیے طالبان حکومت نے افغانستان میں سوشل میڈیا تک رسائی محدود کر دی ہے۔
