آرمی چیف فیلڈ مارشل سید عاصم منیر نے واضح کیا ہے کہ پاکستان اپنی سرحدوں کی حفاظت کے لیے ہر قسم کی براہِ راست یا بالواسطہ خلاف ورزی کا بھرپور اور فیصلہ کن جواب دے گا۔
آئی ایس پی آر کے مطابق، آرمی چیف نے جی ایچ کیو میں منعقدہ 17ویں نیشنل ورکشاپ کے شرکاء، خصوصاً بلوچستان سے تعلق رکھنے والے نمائندوں سے ملاقات کی۔ اس موقع پر انہوں نے بلوچستان کی ترقی، امن اور عوامی خوشحالی سے متعلق وفاقی و صوبائی حکومت کے اقدامات پر تبادلہ خیال کیا۔
فیلڈ مارشل عاصم منیر نے کہا کہ بلوچستان بے پناہ معاشی امکانات رکھتا ہے، جنہیں عوام کی فلاح و بہبود کے لیے استعمال کرنا وقت کی اہم ضرورت ہے۔ انہوں نے نوجوانوں کی شمولیت اور انہیں بااختیار بنانے کے عمل میں سول سوسائٹی کے کردار کو بھی سراہا۔
ان کا کہنا تھا کہ بلوچستان پاکستان کا فخر ہے، یہاں کے عوام باصلاحیت، محب وطن اور ملک کا اصل سرمایہ ہیں۔ انہوں نے کہا کہ پائیدار ترقی کے لیے نوجوانوں کا متحرک کردار ناگزیر ہے، اس لیے ذاتی و سیاسی مفادات سے بالاتر ہوکر قومی مفاد کو ترجیح دینی چاہیے۔
فیلڈ مارشل عاصم منیر نے مزید کہا کہ فتنہ الہند اور فتنہ الخوارج جیسے عناصر ملک میں انتشار اور ترقی مخالف بیانیہ پھیلانےکی مذموم کوششیں کررہےہیں،مگرپاکستان خطے میں امن واستحکام کا خواہاں ہےاور اپنی خودمختاری کے تحفظ کے لیے ہر قیمت پر اقدام کرے گا۔ورکشاپ کے اختتام پر سوال و جواب کا تفصیلی سیشن بھی منعقد کیا گیا۔