وینزویلا نے کہا ہے کہ وہ امریکہ کی دھمکیوں اور الزام تراشیوں کے مقابلے میں کولمبیا کے دفاع کے لیے ہر وقت تیار ہے۔
وینزویلا کے وزیرِ دفاع نے اپنے بیان میں کہا کہ دونوں ممالک کے درمیان سرحدوں پر وینزویلائی فورسز کو کسی بھی ممکنہ خطرے سے نمٹنے کے لیے تعینات کیا گیا ہے۔ انہوں نے مزید کہا کہ امریکہ کی جانب سے بڑھتا ہوا دباؤ علاقائی استحکام کے لیے خطرہ ہے۔
ایرانی سپریم لیڈر نےٹرمپ کی جوہری مذاکرات دوبارہ شروع کرنیکی پیشکش مسترد کر دی
امریکی صدر ڈونلڈ ٹرمپ کے حالیہ بیان پر ردِعمل دیتے ہوئے وینزویلا کے وزیرِ دفاع نے اسے توہین آمیز قرار دیا اور کہا کہ ٹرمپ نے صرف کولمبیا کے صدر نہیں بلکہ پورے کولمبیائی عوام کی توہین کی ہے۔
انہوں نے کہا کہ جو بھی ملک امریکی تسلط کو تسلیم کرنے سے انکار کرتا ہے، وہ واشنگٹن کی دشمنی اور بے بنیاد الزامات کا نشانہ بنتا ہے۔
واضح رہے کہ چند روز قبل ٹرمپ نے اپنے پلیٹ فارم ٹرتھ سوشل پر کولمبیا کے صدر گوستاوو پترو پر منشیات کی کاشت بڑھانے اور منشیات کے کاروبار میں ملوث ہونے کا الزام عائد کیا تھا، جس کے بعد لاطینی امریکا میں سیاسی کشیدگی میں اضافہ دیکھنے میں آیا ہے۔
