راولپنڈی کرکٹ اسٹیڈیم میں پاکستان اور جنوبی افریقا کے درمیان ٹی 20 سیریز کی ٹرافی کی رونمائی کر دی گئی۔ دونوں ٹیموں کے کپتانوں سلمان علی آغا اور ڈونوون فریرا نے ٹرافی کی تقریبِ رونمائی میں شرکت کی۔
واضح رہے کہ دونوں ٹیموں کے درمیان پہلا ٹی 20 میچ 28 اکتوبر کو راولپنڈی کرکٹ اسٹیڈیم میں کھیلا جائے گا، جس کے لیے شائقینِ کرکٹ میں جوش و خروش عروج پر ہے۔
تقریب کے موقع پر پاکستان ٹیم کے وائٹ بال ہیڈ کوچ مائیک بیسن نے میڈیا سے گفتگو کرتے ہوئے کہا کہ وہ پرامید ہیں کہ بابر اعظم شاندار انداز میں ٹیم میں واپسی کریں گے۔
انہوں نے بتایا کہ بابر اعظم تیسرے نمبر پر بیٹنگ کریں گے، جبکہ ٹیم مینجمنٹ ورلڈ کپ کی تیاریوں کے سلسلے میں مختلف آپشنز پر غور کر رہی ہے۔
مائیک بیسن نے مزید کہا کہ جنوبی افریقا کے خلاف سیریز پاکستان ٹیم کے لیے اہم آزمائش اور ورلڈ کپ کی تیاریوں کا بہترین موقع ثابت ہوگی۔
ادھر دونوں ٹیموں کے کپتانوں نے بھی کہا کہ وہ شاندار کرکٹ کھیل کر شائقین کو یادگار مقابلے فراہم کرنے کے لیے پُرعزم ہیں۔
