جامعہ پشاور میں داخلوں کی کم تعداد کے باعث 9 شعبے بند کر دیے گئے ہیں۔ یونیورسٹی کی جانب سے جاری اعلامیے کے مطابق رواں سال بی ایس پروگرامز میں طلبہ کی تعداد غیر معمولی طور پر کم رہی، بعض شعبوں میں صرف ایک یا دو طلبہ نے ہی داخلہ لیا۔
اعلامیے میں کہا گیا ہے کہ 15 سے کم داخلوں والے تمام شعبوں کے انڈر گریجویٹ پروگرام ختم کر دیے گئے ہیں۔ بند کیے جانے والے شعبوں میں جیوگرافی، تاریخ، ہوم اکنامکس، جیالوجی اور اسٹیٹسٹکس شامل ہیں۔
اس کے علاوہ ڈیولپمنٹ اسٹڈیز، سوشل اینتھروپولوجی، لاجسٹکس اینڈ سپلائی چین اینالیٹکس اور ہیومن ڈیولپمنٹ کے شعبوں کو بھی بند کرنے کا فیصلہ کیا گیا ہے۔
جامعہ پشاور کے مطابق ایسے طلبہ جنہوں نے ان شعبوں میں داخلہ لیا تھا، وہ متبادل اکیڈمک پروگرامز کے لیے یونیورسٹی انتظامیہ سے رجوع کریں۔
