انسپکٹر جنرل پولیس پنجاب نے آج سیف سٹی سرگودھا، آر پی او آفس، پولیس خدمت مرکز اور زیرِ تعمیر ٹریفک و ڈی پی او دفاتر کا تفصیلی معائنہ کیا۔
اس موقع پر آر پی او محمد شہزاد آصف خان، ڈی پی او صہیب اشرف، ڈسٹرکٹ ٹریفک آفیسر سمیت پولیس کے سینئر افسران بھی موجود تھے۔
دورے کے دوران آر پی او سرگودھا محمد شہزاد آصف خان نے آئی جی پنجاب کو سیف سٹی پراجیکٹ کی کارکردگی، جرائم کے انسداد اور شہری سلامتی کے لیے کیے گئے اقدامات پر بریفنگ دی۔
آر پی او کے مطابق سیف سٹی کیمروں کی مدد سے سرگودھا میں جرائم کی شرح میں 21 فیصد کمی ریکارڈ کی گئی ہے، جس سے پولیس کی کارکردگی میں نمایاں بہتری آئی ہے۔
آئی جی پنجاب نے سیف سٹی پراجیکٹ کی مانیٹرنگ کو مزید مؤثر بنانے اور جدید ٹیکنالوجی سے زیادہ سے زیادہ استفادہ حاصل کرنے کی ہدایت دی۔
انہوں نے کہا کہ تعلیمی اداروں کے طلبا و طالبات کو بھی سیف سٹی سرگودھا کا دورہ کروایا جائے تاکہ وہ اس جدید نظام کی افادیت اور عوامی تحفظ میں اس کے کردار سے آگاہ ہو سکیں۔
آئی جی پنجاب نے آر پی او آفس سرگودھا کے مختلف شعبوں کا معائنہ کیا، ریکارڈ کا جائزہ لیا اور سٹاف سے فراہم کردہ سہولیات کے بارے میں استفسار کیا۔
انہوں نے پولیس خدمت مرکز سرگودھا کا بھی دورہ کیا اور شہریوں کو فراہم کی جانے والی سہولتوں کے معیار کا جائزہ لیا۔
اس موقع پر آئی جی پنجاب نے زیرِ تعمیر ٹریفک دفاتر اور ڈی پی او آفس کے کاموں کا معائنہ کرتے ہوئے تعمیراتی رفتار تیز کرنے کی ہدایت جاری کی تاکہ یہ منصوبے جلد مکمل ہو سکیں۔
آئی جی پنجاب نے کہا کہ سیف سٹی پراجیکٹس جدید پولیسنگ کا بنیادی حصہ ہیں، جن کے ذریعے نہ صرف جرائم پر قابو پانے بلکہ عوام کے جان و مال کے تحفظ کو یقینی بنایا جا سکتا ہے۔
