ایران کے صدر مسعود پزشکیان نے کہا ہے کہ ایران اپنی جوہری تنصیبات کو مزید طاقت کے ساتھ دوبارہ تعمیر کرے گا، تاہم ملک کا ایٹمی ہتھیار بنانے کا کوئی ارادہ نہیں۔
غیر ملکی خبررساں ایجنسی کے مطابق، ایرانی صدر نے یہ بات ایران کی ایٹمی توانائی تنظیم کے دورے کے موقع پر کہی، جہاں انہوں نے جوہری صنعت کے سینیئر حکام سے ملاقات کی۔
صدر پزشکیان نے سرکاری میڈیا سے گفتگو میں کہا کہ "عمارتوں اور فیکٹریوں کو تباہ کرنے سے ہمیں کوئی مسئلہ نہیں، ہم انہیں دوبارہ تعمیر کریں گے، اور اس بار زیادہ طاقت کے ساتھ۔”
انہوں نے مزید کہا کہ ایران کا جوہری پروگرام عوام کے مسائل حل کرنے، بیماریوں کے علاج اور صحت کے فروغ کے لیے ہے۔
واضح رہے کہ جون میں امریکا نے ایران کی جوہری تنصیبات پر حملے کیے تھے، جنہیں امریکا کے مطابق ایران کے ایٹمی ہتھیاروں کے پروگرام کا حصہ سمجھا جاتا ہے، تاہم ایران کا مؤقف ہے کہ اس کا جوہری پروگرام مکمل طور پر پُرامن اور غیر فوجی مقاصد کے لیے ہے۔
دوسری جانب، امریکی صدر ڈونلڈ ٹرمپ نے خبردار کیا ہے کہ اگر ایران نے تباہ شدہ جوہری تنصیبات کو دوبارہ فعال کرنے کی کوشش کی تو وہ نئے فضائی حملوں کا حکم دیں گے۔
