وزیر دفاع خواجہ آصف نے پارلیمنٹ کے باہر صحافیوں سے گفتگو کرتے ہوئے کہا کہ آئینی ترمیم کے حوالے سے تمام سیاسی جماعتوں سے مشاورت جاری ہے، اور اگلے ہفتے اس کی واضح شکل سامنے آجائے گی۔
ان کا کہنا تھا کہ فی الحال یہ نہیں کہا جا سکتا کہ کس بات پر بحث ہو رہی ہے، کیونکہ اس مرحلے پر تبصرہ کرنا مناسب نہیں۔ خواجہ آصف نے بلاول بھٹو کے بیان پر ردعمل دیتے ہوئے کہا کہ اظہارِ رائے ان کا حق ہے، تاہم حتمی فیصلہ تمام جماعتوں کی مشاورت کے بعد ہی سامنے آئے گا۔
پاک افغان مذاکرات کے حوالے سے انہوں نے کہا کہ بات چیت تبھی مؤثر ہوتی ہے جب پیش رفت کی امید ہو، بصورت دیگر یہ وقت کا ضیاع ہے۔
انہوں نے بتایا کہ وفد روانہ ہو چکا ہے اور کل سے مذاکرات کا آغاز ہوگا، امید ہے افغانستان دانشمندی کا مظاہرہ کرتے ہوئے خطے میں امن کے قیام کے لیے مثبت کردار ادا کرے گا۔
