ترجمان دفترِ خارجہ طاہر اندرابی نے کہا ہے کہ بھارت کے جتنے طیارے پاکستان نے گرائے، اس کی تعداد پر پاکستان آج بھی قائم ہے، البتہ ابہام صرف گرائے گئے طیاروں کے ماڈل، جیسے رافیل یا دیگر اقسام، کے بارے میں ہے۔
انہوں نے بریفنگ میں کہا کہ پاکستان کی بہادر فضائیہ نے جس تعداد میں بھارتی طیارے گرائے، وہ تاریخ کا حصہ بن چکا ہے۔
پاک فضائیہ نے کئی گنا بڑے دشمن کو شکست دے کر دنیا کو حیران کیا، جس کے بعد جنگ بندی کی درخواست خود بھارت نے امریکی صدر سے کی تھی۔
ترجمان دفتر خارجہ نے مزید کہا کہ بھارتی جنگی تیاریوں کے مقابلے میں پاکستان کی دفاعی صلاحیتیں اور تیاری جدید اور مؤثر ہیں۔
انہوں نے واضح کیا کہ سندھ طاس معاہدے کی کسی بھی خلاف ورزی کو پاکستان کسی صورت برداشت نہیں کرے گا اور اپنے عوام کے تحفظ کو ہر حال میں یقینی بنائے گا۔
