پاکستان کےوزارتِ اطلاعات و نشریات نے افغان میڈیا اور سوشل میڈیا اکاؤنٹس کی جانب سے پھیلائی جانے والی پاکستان مخالف جھوٹی اور گمراہ کن خبروں کا پردہ چاک کر دیا ہے۔
وزارت اطلاعات کے مطابق افغان سوشل میڈیا پلیٹ فارمز نے پاک فوج پر مساجد اور قرآنِ مجید کی بے حرمتی کے بے بنیاد الزامات عائد کیے، یہاں تک کہ ایک ویڈیو میں فوجی اہلکاروں پر مسجد میں کتوں کے استعمال کا جھوٹا دعویٰ بھی کیا گیا۔
وزارتِ اطلاعات نے وضاحت کی کہ کسی پاکستانی یا بین الاقوامی میڈیا ادارے نے ایسی کسی واقعے کی تصدیق نہیں کی۔
سوشل میڈیا ویریفیکیشن ٹولز کے مطابق، وائرل ویڈیو کسی حقیقی فوٹیج پر مبنی نہیں بلکہ مصنوعی ذہانت (اے آئی) کے ذریعے تیار کی گئی تھی۔
وزارت نے بتایا کہ یہ جعلی مہم ایک سیاسی بیان سے شروع ہوئی جسے افغان اکاؤنٹس نے بڑھا چڑھا کر پیش کیا، تاہم عوامی ردعمل کے بعد چودہ گھنٹے کے اندر خود افغان اکاؤنٹ نے اعتراف کیا کہ ویڈیو دراصل اے آئی سے تیار کی گئی تھی۔
پاکستانی وزارتِ اطلاعات کا کہنا ہے کہ افغان سوشل میڈیا اکاؤنٹس اور میڈیا باقاعدگی سے جھوٹے دعوؤں کے ذریعے مذہبی جذبات کو سیاسی مقاصد کے لیے استعمال کر رہے ہیں، جب کہ بھارت اور افغانستان مل کر جعلی مواد کے ذریعے پاک فوج اور ریاستی اداروں کی ساکھ کو نقصان پہنچانے کی کوشش میں مصروف ہیں۔
