اسلام آباد کچہری حملے سے متعلق ایک اوراہم پیشرفت سامنے آئی ہے، ذرائع کے مطابق سیکیورٹی اداروں نے حملے کے سہولت کار اور ہینڈلر دونوں کو گرفتار کر لیا ہے۔
ذرائع کے مطابق سہولت کار گزشتہ ایک ماہ سے راولپنڈی میں مقیم تھا، جہاں سے اسے حراست میں لیا گیا، جبکہ حملے کے ہینڈلر کو خیبرپختونخوا سے گرفتار کیا گیا ہے۔
ذرائع کا کہنا ہے کہ دونوں ملزمان کا تعلق خیبرپختونخوا سے ہے، جنہیں گرفتار کرنے کے بعد تفتیش کے لیے نامعلوم مقام پر منتقل کر دیا گیا ہے۔
تفتیشی ذرائع کے مطابق خودکش حملے سے قبل سہولت کار اور حملہ آور نے متعدد بار جوڈیشل کمپلیکس کا دورہ کیا اور وہاں کے داخلی راستوں کا تفصیلی جائزہ لیا۔
واضح رہے کہ اسلام آباد کے جوڈیشل کمپلیکس میں ہونے والے خودکش دھماکے میں 12 افراد شہید جبکہ 36 زخمی ہوئے تھے۔
اس سے قبل سیکیورٹی ادارے اس حملے میں ملوث موٹر سائیکل سوار کو بھی گرفتار کر چکے ہیں، جو حملہ آور کو جوڈیشل کمپلیکس تک لایا تھا۔
