آزاد کشمیر کے نو منتخب وزیراعظم راجہ فیصل ممتاز راٹھور نے اپنے پہلے خطاب میں واضح کیا کہ ان کے اثاثے آج جیسے ہیں، وزارتِ عظمیٰ کے بعد بھی وہی رہیں گے اور عوام اس کا خود مشاہدہ کر سکیں گے۔
آزاد کشمیر اسمبلی سے خطاب کرتے ہوئے انہوں نے کہا کہ اللہ تعالیٰ نے ایک سیاسی کارکن کے کندھوں پر بڑی ذمہ داری رکھ دی ہے، اور یہ ذمہ داری صرف ان پر نہیں بلکہ اُن تمام اراکین پر بھی عائد ہوتی ہے جنہوں نے ان پر اعتماد کرتے ہوئے ووٹ دیا۔
انہوں نے یاد دلایا کہ ماضی میں ذوالفقار علی بھٹو اور بے نظیر بھٹو نے بھی ان کے والد پر وزارتِ عظمیٰ کی ذمہ داری ڈالی تھی، اور اب بلاول بھٹو نے انہیں اسی بھاری اعتماد کے ساتھ اس منصب کے لیے چنا ہے۔
فیصل ممتاز راٹھور نے سابق وزیراعظم کے اسمبلی سے رخصت ہونے کے انداز کو بھی تاریخ کا غیر معمولی واقعہ قرار دیا اور کہا کہ پہلی بار جانے والا وزیراعظم آنے والے وزیراعظم کو خوش آمدید کہتا ہوا ایوان سے رخصت ہوا۔
اپنے خطاب کے دوران انہوں نے کہا کہ ایکشن کمیٹی ایک حقیقت ہے اور اسے تسلیم کیے بغیر آگے نہیں بڑھا جا سکتا۔ عوامی مسائل کو محدود وسائل کے اندر رہتے ہوئے حل کرنا ہوگا، اور وہ بطور وزیراعظم عہد کرتے ہیں کہ ان کے قلم سے کوئی کام تاخیر کا شکار نہیں ہوگا۔
انہوں نے اپنے بارے میں پائے جانے والے تاثر کی وضاحت کرتے ہوئے کہا کہ لوگ سمجھتے ہیں کہ سیاست دان مراعات یافتہ طبقے سے تعلق رکھتے ہیں، مگر ان کا اپنا سفر اس کے برعکس ہے۔
انہوں نے بتایا کہ ان کے والد نے ایک مکان بنایا تھا جسے انہوں نے اپنے انتخابی اخراجات پورے کرنے کے لیے فروخت کر دیا، اور یہی ان کی عملی سیاست اور اصولی زندگی کا ثبوت ہے۔
