خیبر پختونخوا کے مختلف علاقوں میں سکیورٹی فورسز کی کارروائیوں کے دوران بھارتی پراکسی فتنہ الخوارج کے 13 دہشت گرد ہلاک ہوگئے۔
پاک فوج کے شعبہ تعلقاتِ عامہ کے ادارے آئی ایس پی آر کے مطابق یہ کارروائیاں 20 اور 21 نومبر کو دو الگ مقامات پر کی گئیں۔
ترجمان کے مطابق پہلی کارروائی لکی مروت کے علاقے پہر خیل میں خفیہ اطلاع کی بنیاد پر کی گئی، جس میں سکیورٹی اداروں نے مشترکہ طور پر حصہ لیا۔
آپریشن کے دوران دہشت گردوں کے ساتھ شدید فائرنگ کا تبادلہ ہوا، جس میں 10 خوارج ہلاک ہوگئے۔ سکیورٹی فورسز نے ان کے ٹھکانے کو مؤثر انداز میں نشانہ بنایا۔
بیان کے مطابق دوسری کارروائی ڈیرہ اسماعیل خان میں خفیہ اطلاع پر کی گئی، جہاں فائرنگ کے تبادلے میں مزید 3 خوارج مارے گئے۔ دونوں آپریشنز کے دوران ہلاک دہشت گردوں سے اسلحہ اور گولہ بارود بھی برآمد ہوا۔
آئی ایس پی آر کا کہنا ہے کہ یہ خوارج سکیورٹی فورسز اور بے گناہ شہریوں کی ٹارگٹ کلنگ میں ملوث تھے۔ ترجمان نے واضح کیا کہ عزمِ استحکام کے تحت دہشت گردی کے خلاف کارروائیاں جاری رہیں گی اور ملک سے بیرونی پشت پناہی یافتہ دہشت گردی کے ناسور کا مکمل خاتمہ کیا جائے گا۔
