مسابقتی کمیشن نے مہنگی کتابیں،کاپیاں اور یونیفارمز فروخت کرنے کے الزام میں ملک کے 17 بڑے نجی سکول سسٹمز کو شوکاز نوٹس جاری کر دیے ہیں۔
نجی ٹی وی چینل جیو نیوزکے مطابق کمیشن نے اسکولوں کو 14 روز میں تحریری جواب جمع کرانے کی ہدایت کرتے ہوئے واضح کیا ہے کہ خلاف ورزی ثابت ہونے پر ساڑھے 7 کروڑ روپے تک جرمانہ عائد کیا جا سکتا ہے۔
اعلامیے کے مطابق جن اسکول سسٹمز کو نوٹس جاری کیے گئے، وہ طلبہ کو لوگو والی مہنگی نوٹ بکس اور یونیفارمز خریدنے پر مجبور کر رہے تھے۔
کمیشن کی جانچ میں لوگو والی کاپیاں عام مارکیٹ کے مقابلے میں 280 فیصد تک مہنگی پائی گئیں۔ والدین سستے متبادل ذرائع سے خریداری نہیں کر سکتے، جس کے باعث وہ ’یرغمال صارفین‘ بن جاتے ہیں، اور یہ عمل کمپٹیشن ایکٹ کی خلاف ورزی ہے۔
مسابقتی کمیشن نے کہا کہ ملک بھر میں ان نجی اسکول سسٹمز کے ہزاروں کیمپس ہیں اور ان کی پالیسیوں سے لاکھوں طلبہ اور والدین متاثر ہوتے ہیں۔
نئے ایڈمیشن کے اخراجات اور سفری مسائل کے باعث والدین کے لیے اسکول تبدیل کرنا بھی مشکل ہوتا ہے۔ اس صورتحال سے اسٹیشنری اور یونیفارم فروخت کرنے والے ہزاروں چھوٹے کاروبار بری طرح متاثر ہو رہے ہیں۔
