پاکستان اور ایشیائی ترقیاتی بینک کے درمیان انفراسٹرکچر اور ترقیاتی شعبوں میں تعاون کے لیے تین اہم معاہدوں پر دستخط ہو گئے ہیں۔ ترجمان اقتصادی امور ڈویژن کے مطابق یہ معاہدے ملک میں ٹرانسپورٹ اور پانی کے وسائل کی بہتری کے لیے اہم سنگِ میل ثابت ہوں گے۔
ترجمان کے مطابق ایم ایل ون کراچی روہڑی سیکشن کے لیے پراجیکٹ ریڈی نیس فنانسنگ، کوئٹہ بس ریپڈ ٹرانزٹ (بی آر ٹی) کے لیے پراجیکٹ ریڈی نیس فنانسنگ اور بلوچستان واٹر ریسورسز ڈویلپمنٹ سیکٹر منصوبے کے لیے اضافی فنانسنگ کے معاہدوں پر دستخط کیے گئے۔
معاہدوں پر حکومتِ پاکستان کی جانب سے سیکرٹری اقتصادی امور محمد کریم اور سیکرٹری ریلوے مظہر علی شاہ نے دستخط کیے، جبکہ ایشیائی ترقیاتی بینک کی جانب سے کنٹری ڈائریکٹر ایما فین نے معاہدے پر دستخط کیے۔
سیکرٹری اقتصادی امور نے اہم منصوبوں میں معاونت پر ایشیائی ترقیاتی بینک کا شکریہ ادا کرتے ہوئے کہا کہ یہ منصوبے پاکستان میں پائیدار ترقی کا باعث بنیں گے۔ کنٹری ڈائریکٹر ایما فین نے حکومت پاکستان کے ترقیاتی عزم کو سراہتے ہوئے کہا کہ ADB پاکستان کے ساتھ تعاون جاری رکھے گا۔
