چیئرمین پاکستان پیپلز پارٹی بلاول بھٹو زرداری نے کہا ہے کہ سیاسی تنقید کیلئے وہ ہمیشہ دستیاب ہیں، لیکن یہ قابلِ قبول نہیں کہ کوئی دن رات افواجِ پاکستان کو نشانہ بنائے۔ انہوں نے کہا کہ ایسے رویے کا مقصد فوج اور عوام کے درمیان دراڑ ڈالنا ہے، جسے برداشت نہیں کیا جائے گا۔
باغبانپورہ میں پیپلز پارٹی کی رہنما زبیدہ جعفری کے انتقال پر اہلخانہ سے تعزیت کے بعد میڈیا سے گفتگو کرتے ہوئے بلاول بھٹو نے کہا کہ پاکستان ایک بار پھر نازک دور سے گزر رہا ہے، اس لیے پوری قوم خصوصاً سیاسی قیادت کی ذمہ داری ہے کہ متحد ہو کر فوج کے ساتھ کھڑی ہو۔
انہوں نے کہا کہ افغانستان کے حوالے سے وہ طویل عرصے سے خبردار کرتے آئے ہیں کہ دہشت گرد ہمارے عوام، فوج اور پولیس پر حملے کرکے افغانستان فرار ہوجاتے ہیں، جہاں سے انہیں مدد بھی ملتی ہے۔
بلاول بھٹو زرداری کا کہنا تھا کہ پاکستان کو اندرونی چیلنجز بھی درپیش ہیں اور افسوس کے ساتھ کہنا پڑتا ہے کہ کچھ عناصر سنگین حالات میں اداروں پر حملہ آور ہو جاتے ہیں اور اپنی ہی جماعت کو مشکل میں ڈال دیتے ہیں۔
پی ٹی آئی کا نام لیے بغیر انہوں نے کہا کہ عوام کے مسائل پر توجہ دی جائے۔ "ہم سیاسی تنقید سننے کے لیے تیار ہیں، لیکن یہ کیا کہ آپ دن رات فوج کو گالیاں دیں اور ہم خاموش رہیں؟” انہوں نے کہا کہ ایسے عناصر کی سازش ہے کہ فوج اور عوام کے درمیان فاصلے بڑھائے جائیں، مگر پیپلز پارٹی ایسا ہونے نہیں دے گی۔
