خیبر پختونخوا کے مختلف علاقوں میں سکیورٹی فورسز کی مؤثر کارروائیوں کے دوران بھارتی پراکسی فتنہ الخوارج سے تعلق رکھنے والے 13 دہشت گرد ہلاک ہو گئے۔ پاک فوج کے شعبۂ تعلقاتِ عامہ کے مطابق یہ کارروائیاں 12 اور 13 دسمبر کو کی گئیں۔
آئی ایس پی آر کے مطابق ضلع مہمند میں انٹیلی جنس بیسڈ آپریشن کے دوران سکیورٹی فورسز نے خوارج کے ایک ٹھکانے کو نشانہ بنایا۔ کارروائی کے دوران شدید فائرنگ کا تبادلہ ہوا، جس کے نتیجے میں 7 دہشت گرد مارے گئے۔
اسی طرح ایک اور انٹیلی جنس بیسڈ آپریشن ضلع بنوں میں کیا گیا، جہاں سکیورٹی فورسز نے مزید 6 خوارج کو ہلاک کیا۔ آئی ایس پی آر کا کہنا ہے کہ علاقوں میں کسی بھی دیگر خارجی دہشت گرد کی موجودگی کے خاتمے کے لیے کلیئرنس آپریشن جاری ہے۔
آئی ایس پی آر نے واضح کیا ہے کہ عزمِ استحکام کے تحت سکیورٹی فورسز کی انسداد دہشت گردی مہم پوری قوت کے ساتھ جاری رہے گی اور ملک سے غیر ملکی سرپرستی اور حمایت یافتہ دہشت گردی کے ناسور کا مکمل خاتمہ کیا جائے گا۔
