بھارتی خفیہ ایجنسی را کی جانب سے بلوچستان میں بدامنی پھیلانے اور منظم سازشوں میں ملوث ہونے کا ایک مرتبہ پھر پردہ فاش ہو گیا ہے۔ ذرائع کے مطابق انسانیت سوز پالیسیوں پر گامزن مودی حکومت کی سرپرستی میں بلوچستان کے خلاف نئی سازشیں کی جا رہی ہیں، جن میں بھارتی خفیہ نیٹ ورک اور فتنہ الہندوستان کے عناصر سرگرم پائے گئے ہیں۔
تحقیقات کے دوران پاکستان مخالف پروپیگنڈا میں ملوث ’’پیج 3 نیوز تھائی‘‘ کے نام سے چلنے والے ایکس (سابقہ ٹوئٹر) اکاؤنٹ کے بھارت سے کنٹرول ہونے کا انکشاف ہوا ہے۔ بتایا گیا ہے کہ یہ اکاؤنٹ جعلی شناخت کے ذریعے غدارِ وطن میر یار بلوچ کے نام پر بارہا پیغام رسانی اور منفی مہم چلانے میں استعمال کیا جاتا رہا۔
ذرائع کے مطابق مذکورہ بھارتی اکاؤنٹ سے میر یار بلوچ کے نام پر من گھڑت دعوے، تاریخی حقائق میں تحریف اور بھارتی ایجنڈے کی تشہیر مسلسل کی جا رہی ہے، جبکہ بلوچ شناخت کو منظم سازش کے تحت دہشتگردی کے فروغ کے لیے بطور ہتھیار استعمال کیا جا رہا ہے۔
حال ہی میں بین الاقوامی سامعین کو گمراہ کرنے کے لیے اسی جعلی اکاؤنٹ سے بھارتی پروپیگنڈا پر مبنی ایک طویل پیغام جاری کیا گیا، جو درحقیقت را کی جانب سے تیار کردہ بلوچستان مخالف بیانیے کا حصہ تھا۔ تھائی سماجی ایپ ایکس کے مطابق یہ اکاؤنٹ بھارت سے تھائی لینڈ کے وی پی این کے ذریعے آپریٹ کیا جا رہا تھا۔
ماہرین کے مطابق پاکستان مخالف پروپیگنڈا مہم اور شرپسند عناصر کی سرپرستی نے بھارت کے مذموم عزائم کو عالمی سطح پر بے نقاب کر دیا ہے، جبکہ بھارتی ایما پر بلوچستان میں بدامنی اور دہشتگردی کے ناقابلِ تردید شواہد دنیا کے سامنے آ چکے ہیں۔
