لیہ کے علاقے بستی ککڑ والا میں افسوسناک واقعہ پیش آیا جہاں سیوریج کے کھلے گڑھے میں گر کر 2 سالہ بچہ جاں بحق ہو گیا۔ اہلِ خانہ کے مطابق بچہ گھر کے قریب کھیل رہا تھا کہ اچانک توازن بگڑنے کے باعث سیوریج کے گڑھے میں جا گرا۔
بچے کے والد نے بتایا کہ علاقے میں سیوریج کا باقاعدہ نظام موجود نہیں، جس کے باعث مکینوں نے اپنی مدد آپ کے تحت سیوریج کے گڑھے بنا رکھے ہیں جو آئے روز حادثات کا سبب بن رہے ہیں۔
اہلِ علاقہ کا کہنا ہے کہ گزشتہ 6 سال سے انتظامیہ کو متعدد بار درخواستیں دی گئیں مگر تاحال کوئی عملی اقدام نہیں کیا گیا۔ ان کے مطابق کھلے سیوریج گڑھے بچوں اور دیگر شہریوں کے لیے سنگین خطرہ بن چکے ہیں۔
واقعے کے بعد اہلِ علاقہ اور جاں بحق بچے کے والد نے وزیرِ اعلیٰ پنجاب مریم نواز سے فوری نوٹس لینے، ذمہ داروں کے خلاف کارروائی اور علاقے میں سیوریج کا مؤثر نظام قائم کرنے کا مطالبہ کیا ہے۔
