سندھ کابینہ نے پبلک ٹرانسپورٹ بسوں کی خریداری کے لیے 96 کروڑ روپے جاری کرنے کی منظوری دے دی۔ یہ فیصلہ وزیراعلیٰ سندھ مراد علی شاہ کی زیر صدارت ہونے والے کابینہ اجلاس میں کیا گیا۔
اجلاس میں تھرکول ریلوے لائن منصوبے کے لیے بھی 5 ارب 60 کروڑ روپے کے فنڈز جاری کرنے کی منظوری دی گئی۔ وزیراعلیٰ مراد علی شاہ نے بتایا کہ منصوبے کے تحت اسلام کوٹ سے چھور تک 105 کلومیٹر طویل ریلوے لائن بچھائی جائے گی، جس کے ذریعے تھر کا کوئلہ کراچی سمیت ملک کے دیگر علاقوں تک منتقل کیا جا سکے گا۔
وزیراعلیٰ کے مطابق یہ ریلوے منصوبہ سندھ حکومت اور وزارت ریلوے کے درمیان 50،50 فیصد شراکت سے مکمل کیا جا رہا ہے، جس سے صوبے میں توانائی اور صنعتی شعبے کو فروغ ملے گا۔
کابینہ اجلاس میں کراچی میں آئی ٹی ٹاور کے قیام کے حوالے سے بھی غور کیا گیا۔ اجلاس کو بتایا گیا کہ سندھ آئی ٹی ٹاور کے لیے ایک نجی کمپنی کی تاریخی عمارت کے انتخاب پر تبادلہ خیال کیا گیا ہے، جس کی خریداری سے متعلق مزید اقدامات کیے جائیں گے۔
