بلوچستان کی ترقی کے سفر کا نیا باب بلوچستان اسپیشل ڈویلپمنٹ انیشیٹو بھرپور انداز سے جاری ہے۔ حکومت بلوچستان کا یہ خصوصی ترقیاتی پروگرام صوبے میں پائیدار ترقی کا مؤثر ذریعہ بن رہا ہے۔
ترجمان کے مطابق بی ایس ڈی آئی کے تحت جنوبی بلوچستان کے پانچ اضلاع کیچ، خاران، واشک، چاغی اور پنجگور میں 137 منصوبوں کیلئے پانچ ارب روپے مختص کیے گئے ہیں۔ اب تک بلوچستان اسپیشل ڈویلپمنٹ انیشیٹو کے تحت 13 منصوبے تکمیل پا چکے ہیں۔
خاران کی یونین کونسل مسکان، قلات اور کلی مبارک شلتاک میں دو جنازہ گاہوں کی تعمیر مکمل کی جا چکی ہے جبکہ ضلع واشک کے آر ایچ سی ناگ میں جدید سولر سسٹم نصب کیا گیا ہے۔
واشک کے 10 رجسٹرڈ مدارس میں سولر سسٹمز کی تنصیب سے توانائی بحران میں نمایاں کمی آئی ہے۔ اس کے علاوہ واشک میں 40 سولر اسٹریٹ لائٹس نصب کی گئی ہیں جن سے عوامی سہولت اور سکیورٹی میں اضافہ ہوا ہے۔
بلوچستان اسپیشل ڈویلپمنٹ انیشیٹو کا بنیادی مقصد صوبے کے دورافتادہ اور پسماندہ علاقوں میں ضروری سہولیات کی فراہمی یقینی بنانا ہے۔ حکومت بلوچستان کے مطابق یہ پروگرام صوبے کی ترقی، خوشحالی اور عوامی فلاح کی جانب اہم پیش رفت ہے۔
